Sheol Coimisiún na hÉireann um Chearta an Duine agus Comhionannas (“an Coimisiún”) feachtas feasachta náisiúnta suntasach inniu dar teideal Cúram a Dhéanamh den Chomhionannas. Is é seo an tríú cuid den tsraith feachtas “Mar gur daoine muid ar fad, is mar a chéile muid ar fad”.
Cé gur dhírigh na feachtais roimhe seo ar mheonta i leith ciníochais agus míchumais, tugann Cúram a Dhéanamh den Chomhionannas dúshlán na meonta seanbhunaithe sa tsochaí faoi nádúr thar a bheith inscneach an chúraim, idir chúram gan phá agus chúram ar phá íseal, agus an chaoi a dtéann sé sin i bhfeidhm ar mhná san ionad oibre.
Beidh an feachtas náisiúnta gan script ar siúl i gcaitheamh mhí Eanáir ar fhógraíocht teilifíse, raidió, shóisialta agus dhigiteach ó inniu, Dé hAoine, 6 Eanáir, nó Lá Nollag na mBan. Léirítear agallaimh le mná ó chúlraí difriúla agus roinneann siad a ndearcthaí pearsanta ar an gcaoi a dtéann neamhionannas inscne agus obair chúraim i bhfeidhm ar a saol ó lá go lá, ar a bhféidearthachtaí gairme agus ar a dtodhchaí.
Féachann an feachtas le daoine a chumasú le gnéasachas laethúil agus struchtúrtha a aithint agus a dhúshlán a thabhairt sa bhaile agus san ionad oibre, ag nochtadh dhofheictheacht luach an chúraim sa tsochaí agus na neamhionannas inscne dá mbarr.
Dúirt rannpháirtithe an fheachtais:
“Ní ceist a bhaineann le mná amháin é cúram. Baineann cúram le gach duine. Beidh freagrachtaí cúraim orainn ar fad ó chliabhán go cróchar. Caithfimid glacadh leis sin agus caithfimid tacú leis trí chórais agus struchtúir a chur i bhfeidhm do dhaoine, seachas brath ar mhná é a dhéanamh díreach ‘mar gurb in a dhéanann siad’. Linda K.
“Tá an oiread dár n-obair mar dhaoine a thugann aire do dhaoine eile gan phá. Agus nuair a chuirtear i dtimpeallacht ghairmiúil é, tá sé tearc-íoctha. Is éard a léiríonn sé fúinn i ndáiríre ná gur cuma linn. Is cuma linn mar go n-íocaimid na daoine a thugann aire do dhaoine eile, na daoine a dhéanann an obair sin, pá beag bídeach.” Ailbhe S.
Dúirt an Príomh-Choimisinéir Sinéad Gibney:
“Rud amháin atá i bpáirt againn ar fad – idir mhná agus fhir, idir óg agus aosta – ná go gcaithfidh daoine eile aire a thabhairt dúinn i rith tréimhsí áirithe dár saol. Tá cúram riachtanach le go mairfimid, mar dhaoine aonair agus mar shochaí. Ní haon áibhéil a rá go dtitfeadh ár sochaí agus an geilleagar mar a thuigimid é as a chéile gan an obair chúraim a dhéanann mná.
“Tá an chaoi a gcaitheann an tsochaí le cúram lárnach sa chomhionannas. Má leantar á mheas faoina luach, táimid ag rá go coinsiasach nach meastar mar an gcéanna an infheistíocht ama agus chúraim a dhéanann leath an daonra. Agus, dá réir, nach meastar mná mar an gcéanna.
“Má táimid dáiríre faoi chearta an duine agus comhionannas, ní mór d’Éirinn caidreamh nua a aimsiú idir róil fostaíochta íoctha, cúraim agus inscne, agus bearta mar bhonn faoi chun tacú le tuismitheoirí fostaithe agus cúramóirí eile.”
CRÍOCH/
Déanfaidh Fennels grianghraif don fheachtas Cúram a Dhéanamh den Chomhionannas a shindeacáitiú an 5 Eanáir lena n-úsáid an 6 Eanáir.
Tá na fógraí teilifíse ar fáil anseo:
Teilifís: https://vimeo.com/ihrec/lindak
Físeán ar éileamh (VOD): https://vimeo.com/ihrec/ailbhe
Tá leathanach gréasáin an fheachtais ar fáil anseo: www.ihrec.ie/careaboutequality
Rannpháirtithe an Fheachtais
- Ailbhe Smyth – https://vimeo.com/ihrec/ailbhe
- An Dr Rosaleen McDonagh – https://vimeo.com/ihrec/rosaleenm
- Evie Nevin – https://vimeo.com/ihrec/evie
- Linda Kelly – https://vimeo.com/ihrec/lindak
- Linda O’Sullivan – https://vimeo.com/ihrec/lindaos
- Mary Darcy – https://vimeo.com/ihrec/mary
- Louise Bayliss – https://vimeo.com/ihrec/louise
- Mariaam Bhatti – https://vimeo.com/ihrec/mariaam
Grúpa Comhairliúcháin an Fheachtais
Gabhaimid buíochas leis na comhaltaí a leanas den ghrúpa comhairliúcháin a chur le forbairt an fheachtais seo:
Bridget Kelly, Claire Duffy, Colm Kelly Ryan, an Dr Rosaleen McDonagh, Karen Kiernan, Mariaam Bhatti, Orla O’Connor, Ursula Barry, Síona Cahill agus Suzy Byrne.