Léim go dtí an t-ábhar

Fáiltíonn an Coimisiún roimh chomhaontú Sigmar Recruitment agus Staffline Recruitment tabhairt faoi athbhreithnithe comhionannais

 D’fhógair Coimisiún na hÉireann um Chearta an Duine agus Comhionannas (‘an Coimisiún’) inniu gur bhain sé leas as a chumhachtaí dlí, faoi alt 32(1)(a) d’Acht IHREC, 2014, chun iarraidh ar dhá ghníomhaireacht earcaíochta, Sigmar Recruitment Consultants Limited (‘Sigmar Recruitment’) agus Staffline Recruitment (ROI) Limited (‘Staffline Recruitment’), tabhairt faoi athbhreithnithe comhionannais ar a seirbhísí faoi seach. Ghlac an dá chuideachta leis sin. Faoin Acht um Bainistíocht na Seirbhíse Poiblí (Earcaíocht agus Ceapacháin) 2004, is féidir leis an gCoimisiún um Cheapacháin Seirbhísí Poiblí ceadúnais a bhronnadh ar chomhlachtaí poiblí chun gur féidir leo tabhairt faoina n-earcaíocht féin. Is féidir leis na comhlachtaí poiblí sin cabhair a iarraidh ansin ar ghníomhaireacht earcaíochta san earnáil phríobháideach leis na cúraimí a bhaineann leis na próisis earcaíochta. Faoi na hAchtanna um Chomhionannas Fostaíochta, caithfidh fostóir ‘bearta cuí’ a thógáil chun freastal ar riachtanais daoine faoi mhíchumas sa lucht saothair. Áirítear leis sin oibleagáid a chinntiú go bhfuil socruithe i bhfeidhm chun a chur ar chumas duine atá faoi mhíchumas comhdheiseanna a fháil nuair a chuireann siad isteach ar obair. Baineann an oibleagáid sin le gníomhaireachtaí fostaíochta agus éilítear ar ghníomhaireacht fostaíochta ‘bearta cuí’ a thógáil má theastaíonn ó dhuine atá faoi mhíchumas úsáid a bhaint as aon seirbhís a sholáthraíonn an ghníomhaireacht fostaíochta chun fostaíocht a rochtain, nó má bhaineann siad úsáid aisti. D’iarr an Coimisiún ar Sigmar Recruitment agus Staffline Recruitment araon tabhairt faoi athbhreithniú comhionannais ar inrochtaineacht a bpróiseas earcaíochta le haghaidh róil státseirbhíse agus róil seirbhíse poiblí le haghaidh iarrthóirí ar a bhfuil lagú radhairc, go háirithe i gcás soláthar foirmeacha iarratais le haghaidh post agus trialacha mianaigh. Mar chuid dá n-athbhreithnithe comhionannais, d’iarr an Coimisiún ar gach gníomhaireacht go háirithe:
  • Tabhairt faoi iniúchadh ar an leibhéal comhionannais deiseanna atá ar fáil d’iarrthóirí ar a bhfuil lagú radhairc in earcaíocht ról státseirbhíse agus ról seirbhíse poiblí;
  • Na cleachtais, nósanna imeachta nó cúinsí eile (straitéisí, pleananna agus tionscnaimh gníomhaíochta dearfaí, mar shampla) ar fad atá i bhfeidhm faoi láthair agus a bhaineann le hearcaíocht ról státseirbhíse agus ról seirbhíse poiblí le haghaidh iarrthóirí ar a bhfuil lagú radhairc a shainaithint;
  • Measúnú a dhéanamh ar éifeachtacht na gcleachtas, na nósanna imeachta agus na gcúinsí eile sin maidir le hearcaíocht ról státseirbhíse agus ról seirbhíse poiblí agus an comhionannas deiseanna d’iarrthóirí poist ar a bhfuil lagú radhairc; agus
  • Breac-chuntas a thabhairt ar aon mholtaí agus/nó torthaí ón athbhreithniú comhionannais.
Dúirt Liam Herrick, Príomh-Choimisinéir IHREC:
“Earnáil státseirbhís agus phoiblí éifeachtach agus eolach, a bhfuil d’aidhm léi freastal ar mhuintir uile na hÉireann, caithfidh sí an tsochaí ar a bhfreastalaíonn sí a léiriú, de gach cineál. Ba cheart daoine atá faoi mhíchumas, iad siúd ar a bhfuil lagú radhairc ina measc, a spreagadh le páirt a ghlacadh sna hearnálacha. Is deis thábhachtach iad athbhreithnithe comhionannais d’eagraíocht chun machnamh a dhéanamh ar a córais agus a cleachtais, agus chun measúnú a dhéanamh ar an leibhéal comhionannais deiseanna laistigh den eagraíocht sin agus an chaoi ar féidir léi feabhas ar chomhionannas deiseanna a chur chun cinn a shainaithint. Fáiltímid roimh thoilteanas Sigmar Recruitment agus Staffline Recruitment páirt a ghlacadh sa phróiseas seo.”
Toisc gur cuireadh tús leis an bpróiseas sin, ní bheimid ag trácht air seo níos mó. CRÍOCH/ Tá tuilleadh eolais ar fáil ó: Sarah Clarkin, Bainisteoir Cumarsáide, 01 859 2641 / 087 468 7760 Sarah.Clarkin@ihrec.ie Lean muid ar twitter @_IHREC

Nótaí don Eagarthóir:

Athbhreithniú Comhionannais In Alt 32 den Acht fá Choimisiún na hÉireann um Chearta an Duine agus Comhionannas, 2014, tugtar cumhachtaí reachtúla don Choimisiún maidir le tabhairt faoi Athbhreithnithe Comhionannais agus Pleananna Gníomhaíochta Comhionannais a ullmhú. D’fhéadfadh go mbainfeadh Athbhreithniú Comhionannais nó Plean Gníomhaíochta Comhionannais le comhionannas deiseanna go ginearálta, nó le gné faoi leith d’idirdhealú, laistigh d’eagraíocht nó d’eagraíochtaí (san earnáil phoiblí nó phríobháideach). Tuigtear go gciallaíonn comhionannas deiseanna go dtabharfaidh eagraíocht na deiseanna céanna do dhaoine, agus go gcaithfear mar an gcéanna leo, gan míbhuntáiste do na daoine sin ar bhonn aon fhorais idirdhealaitheacha a liostaítear sna hAchtanna um Chomhionannas Fostaíochta, ag féachaint le comhionannas iomlán a chinntiú iarbhír i measc daoine. I measc na bhforas idirdhealaitheach a liostaítear sna hAchtanna um Chomhionannas Fostaíochta tá na forais inscne, stádais phósta, stádais teaghlaigh, aoise, míchumais, gnéaschlaonta, cine, creidimh agus comhaltais den Lucht Siúil. Iarrtar ar eagraíochtaí tabhairt faoi Athbhreithnithe Comhionannais agus is faoin gCoimisiún fócas na n-athbhreithnithe sin, agus aird ar a réimsí d’obair spriocdhírithe agus a thosaíochtaí straitéiseacha. I dtéarmaí neamhdhlíthiúla, is bealach iad Athbhreithnithe Comhionannais d’eagraíocht chun a cleachtais a thagarmharcáil, nó a iniúchadh, le hais a hoibleagáidí faoin dlí comhionannais chun a mheasúnú an bhfuil an eagraíocht, mar fhostóir, ag comhlíonadh a hoibleagáidí reachtúla chun comhionannas deiseanna, nó easpa idirdhealaithe, a chinntiú.

Coimisiún na hÉireann um Chearta an Duine agus Comhionannas

Is comhlacht poiblí neamhspleách é Coimisiún na hÉireann um Chearta an Duine agus Comhionannas, a cheapann an tUachtarán agus atá freagrach go díreach don Oireachtas. Leagtar amach sainchúram reachtúil an Choimisiún faoin Acht fá Choimisiún na hÉireann um Chearta an Duine agus Comhionannas, 2014, is é sin cearta an duine agus an comhionannas a chosaint agus a chur chun cinn in Éirinn, agus cultúr ina bhfuil meas ar chearta an duine, ar an gcomhionannas agus ar thuiscint idirchultúrtha a spreagadh sa Stát. Is é Coimisiún na hÉireann um Chearta an Duine agus Comhionannas foras náisiúnta na hÉireann um chearta an duine agus aitheantas ó na Náisiúin Aontaithe aige dá réir. Is é an Coimisiún comhlacht náisiúnta comhionannais na hÉireann freisin chun críche réimse beart ón Aontas Eorpach in aghaidh an idirdhealaithe.